ဒီဘရိုင်းနားနဲ့ လူကာကူတို့တောင် အချိန်တွေယူခဲ့ကြရတာပါ

 ဒီရာသီမှာ  အသင်း ၊ နည်းပြ ၊  ကစားသမားအားလုံးဟာ တက်လိုက်ကျလိုက် အခြေအနေကိုရင်ဆိုင်ခဲ့ကြရပါတယ်။  ဒီအထဲမှာဆန်ဘီလိုကွန်ဂါလဲအပါအဝင်ပါပဲ။  ပထမအကျော့ ပဲလေ့စ်နဲ့ပွဲအပြီးမှာ  အပြင်းအထန်ဝေဖန်ခံခဲ့ရပြီးနော်  ၂ ပွဲဆက်တိုက်ခြေစွမ်းပြနိုင်တဲ့အခါ  အားကိုးရမယ့် လူငယ်လေးဆိုတဲ့နာမည်ကိုရရှိခဲ့တယ်။  အဲ့ဒီနောက်မှာတော့  ပြန်ပြီး ငုတ်သျိုးသွားခဲ့ပါတယ်။  ဒီအခြေအနေတွေက  လိုကွန်ဂါအတွက်ကျေနပ်စရာဟုတ်ရဲ့လား  .. နောက်ရာသီမှာရော ဆမ်ဘီတစ်ယောက် အာဆင်နယ်မှာရှိနေဦးမှာလား …

ဒီမေးခွန်းတွေကို  လိုကွန်ဂါရဲ့ အစ်ကိုဖြစ်သူ အမ်ပိုကူက အခုလိုပဲမှတ်ချက်ပြုလာပါတယ်။

“ အသင်းကထွက်ဖြစ်မလားဆိုတာ ထည့်တောင်တွေးစရာမလိုတဲ့ကိစ္စပါ .. သူက  အသင်းမှာ တိုးတက်လာနေတယ် .. နေရထိုင်ရတာလဲပိုပြီးအသားကျနေတယ် … ပြောရရင် ထွက်ဖို့ထက် လာမယ့်ရာသီမှာ ကစားချိန်တွေပိုရလာဖို့ကိုတောင် မှန်းနေတာဗျာ  “

“ ပြီးခဲ့တဲ့ တန်လာနေ့တုန်းက သူနဲ့ဖုန်းပြောဖြစ်ပါတယ် .. နယူးကာဆယ်နဲ့ပွဲရှုံးသွားတဲ့အပေါ်ကို တော်တော်လေးစိတ်ညစ်နေပါတယ်  … နောက်ရာသီမှာ ချန်ပီယံလိဂ်ကစားဖို့အခွင့်အရေးကနဲသွားပြီကိုး … ဒါပေမယ့်  ယူရိုပါလိဂ်ဝင်ခွင့်ကရှိနေပြီဖြစ်လို့  ဒီအပေါ်မှာတော့ သူကတော်တော်လေး သဘောကျနေပါတယ် “  လို့ ဆိုလာခဲ့တာပါ။ သူ့အပြောအရ လိုကွန်ဂါဟာ အမ်းမရိတ်မှာ ပျော်ရွင်နေပါတယ်။

သူအပေါ်မှာ အမြင်တွေကလဲ မျိုးစုံဖြစ်နေပါတယ်။ လိုကွန်ဂါဟာ တိုးတက်လာစရာမရှိတော့တဲ့သူလား  .. ဒါမှမဟုတ် ဆက်လက်ထွန်းတောက်လာမယ့်သူလား …  အချိန်ပေးပြီးစောင့်ကြည့်ရမယ့် ကစားသမားလား .. 

REBF သတင်းဌာနဟာ  ဒီအချက်ကိုလည်း ပိုကူကိုမေးမြန်းခဲ့ပါတယ်။ အစ်ကိုဖြစ်သူပိုကူရဲ့အမြင်ကတော့ ဒီလိုပါ။

“  ဘယ်လ်ဂျီယံလိဂ်နဲ့ ပရီးမီးယားလိဂ်အကြားက ကွာဟမှုက သိပ်များတယ်လေဗျာ  .. ဒီဘရိုင်းနားနဲ့ လူကာကူတို့တောင် အချိန်တွေယူခဲ့ကြရတာပါ …  ပြီးတော့ အာဆင်နယ်ဆိုတာ အလယ်အလတ်အသင်းမှ မဟုတ်တာ ..  ဒီရာသီမှာ ပွဲကစားချိန်ရဲ့  ၃၃% မှာပါဝင်ကစားရမယ်ဆိုတဲ့အချက်ကို လက်မှတ်ထိုးထားပြီးသားပါ ..  နောက်ပြီး လိုကွန်ဂါက  နေ့တိုင်းတိုးတက်နေတာပါ .. ဒီအတွက်လဲ လေ့ကျင့်ရေးအစီအစဥ်တွေကို ကျေးဇူးတင်ရမှာပါ “

“ အသင်းမှာနေရာရဖို့ကတကယ်ခက်ပါတယ် .. ပါတေး  ၊  ရှာခါ  ၊ အယ်နီနီတို့ရှိနေတဲ့အသင်းမှာ နည်းပြရဲ့ဆုံးဖြတ်ချက်ကို လေးလေးစားစားလိုက်နာရမှာဖြစ်ပါတယ် ..   အာဆင်နယ်ကလဲ တစ်ပတ်မှာ တစ်ပွဲပဲကစားရချိန်မှာ  အလှည့်ကျစနစ်မှာပါဝင်ရဖို့ဆိုတာက လွယ်တဲ့အရာမဟုတ်ပါဘူး “  လို့ ဆိုခဲ့တာဖြစ်ပါတယ်။

ဘာပဲပြောပြောရာသီသစ်မှာတော့  ယူရိုပါလိဂ်ပွဲတွေကြောင့် လိုကွန်ဂါရဲ့ ခြေစွမ်းကို ပိုပြီးမြင်ရဖို့ရှိနေပါတယ်။ လိုကွန်ဂါရဲ့ခြေစွမ်းက အဆင့်မမှီတာဖြစ်နိုင်သလို  အာဆင်နယ်ရဲ့ ခရီးကြမ်းမှာ  လိုကွန်ဂါတစ်ယောက်လိုတာထက်ပိုပြီးရုန်းကန်ခဲ့ရတာလဲဖြစ်နိုင်ပါတယ်။

Thanks for reading our contents.