လက်ကျန် ၅ ပွဲမှာ Arteta Out ဘယ်နှကြိမ်အော်ရဖို့ရှိသေးလဲ

ပရီးမီးယားလိဂ်ပွဲကျန်  ၇ ပွဲကျန်တုန်းက  အာဆင်နယ်ပရီတ်သတ်တွေရဲ့ အနေအထားနဲ့  ၅ ပွဲကျန်ချိန်ကတော့ အလွန်ကွာခြားသွားခဲ့ပြီဖြစ်ပါတယ်။ ဒါပေမယ့် ဒီရာသီမှာ  ရိုလာကိုစတာဖြစ်နေတဲ့ အာတီတာအတွက်ကတော့ Arteta Out ကိစ္စတွေကနေ ကင်းလွတ်သွားပြီလို့ ပြောမရသေးတဲ့အခြေအနေပါပဲ။

ဧပြီလ ၂၀ ရက်နေ့ ည ၁၀ နာရီခန့်အထိ  အာတီတာ က အသင်းကနေမဖြစ်မနေထွက်ရမယ့်သူ ၊  အသင်းရဲ့ အကြီးမားဆုံးသော ပြသနာဆိုတဲ့ အသံတွေက  ဆူညံနေခဲ့တယ်။ ဘာစီလိုနာအသင်းအတွက်  အူဘာမီယန်ရဲ့ခြေစွမ်းပြမှုကလည်း အာဆင်နယ်ရဲ့ ရလဒ်အကျမှာ လာပြီးပူးပေါင်းသွားတဲ့ အင်အားဖြစ်ခဲ့ပါတယ်။  သို့သော် နောက်ထပ်နာရီပိုင်းအကြာမှာတော့ ထိုအသံတွေပျောက်သွားခဲ့ပါတယ်။  ပြီးတော့ မန်ချက်စတာယူနိုက်တက်ကို ထပ်ပြီးနိုင်လိုက်ပါတယ်။  တိုက်တိုက်ဆိုင်ဆိုင် အူဘာမီယန် တစ်ယောက်လူမရှိတဲ့ ဂိုးပေါက်ကို လွဲချော်တဲ့ ဗီဒီယိုကလည်းတက်လာပြန်တော့  အာတီတာ Supporter တွေအတွက် ကိုးကားစရာပိုများသွားခဲ့ပါတယ်။ လောလောဆယ်တော့ ဂျေးဆူကိစ္စအပါအဝင်တောက်ပတဲ့အနာဂတ်ကိုပဲ​ တွေးတောပြီး ပရီတ်သတ်တွေက အားတက်နေကြပါတယ်။ တကယ်တော့ ကိစ္စတွေက သူ့ဟာသူလည်ပတ်နေကြတာပါပဲ။

ပွဲကျန် ၅ ပွဲရဲ့ အခြေအနေက စိတ်ဝင်စားစရာတော့ကောင်းတယ်။ စပါးနဲ့ပွဲက  ၃ပွဲမြောက်။ သူနဲ့မတိုင်ခင်က  ၂ ပွဲ .. သူ့အလွန်က ၂ ပွဲ။ အားလုံးကအဆုံးအဖြတ်လို့ပြောထားပေမယ့် အဆုံးအဖြတ်မဖြစ်နိုင်သေး။ ဆိုလိုတာက  မြောက်လန်ဒန်ဒါဘီမှာ ခြေချော်တဲ့အသင်းကလဲ​ အခွင့်ကောင်းပြန်ရနိုင်ပါသေးတယ်။  ပွဲကြပ် ပွဲချောင်ကိစ္စတော့ရှိတာပေါ့လေ။

စပါးနဲ့ပွဲမတိုင်ခင်မှာတင်  အဆင့် ၄ အတွက်ရင်မောရတဲ့ ကိစ္စတွေအပြတ်ဖြတ်နို်င်ဖို့ ပရီတ်သတ်တွေမျှော်လင့်နေကြပါတယ်။ ဒါက လက်တွေ့မှာဖြစ်နိုင်ပါသလား။  လက်စတာနဲ့ လီဗာပူးလ်ပွဲတွေမှာ စပါးက ခြေချော်ပြီး  အာဆင်နယ်က တဖက်မှာ အမှတ်ပြည့်ယူလိုက်နိုင်ရင်တော့ ဂန်းနားပရိတ်သတ်တွေအလွန်ပျော်ကြဖွယ်ရှိပါတယ်။ ဒါပေမယ့် အနေအထားက တွေသလောက်မရိုးရှင်းပါဘူး။

လက်စတာ ၊ လီဗာပူးလ်တို့ဆီမှာ  စပါးက အမှတ်လျော့ပြီး  အာဆင်နယ်က အခွင့်အရေးမယူနိုင်ခဲ့ရင်  ..

တကယ်လို့သာ ခေါင်းစဥ်တပ်ထားတဲ့အတိုင်းဖြစ်လာခဲ့ရင် အာတီတာ Out ကိစ္စက တစခန်းပြန်ထလာနိုင်ပါတယ်။  ဖြစ်နိုင်စရာလဲရှိပါတယ်။  ဘာကြောင့်လဲဆိုရင်  ဝက်စ်ဟမ်းရဲ့ မာကျောမှု ၊ လိဒ်စ်ရဲ့  Rhythm ပြန်တက်လာမှုတွေက အာဆင်နယ်ကို  အဟန့်အတားဖြစ်စေနိုင်ပါတယ်။ ဒါပေမယ့် တဖက်မှာ လုံးဝဥသုံပွဲကြပ်နေတဲ့ စပါးရဲ့  အမှတ်လျော့မှုကို အခွင့်အရေးမယူနိုင်ဘူးဆိုရင်တော့  ပရိတ်သတ်တွေရဲ့ အားမလိုအားမရဖြစ်မှုတွေက တဖန်ပြန်ဖြစ်လာဦးမှာပါ။

စပါးနဲ့ပွဲမှာသာ အာဆင်နယ်ရှုံးခဲ့ရင်

ဒီအခြေအနေက ပိုဆိုးပါတယ်။ သေချာပေါက်ကို  ပရိတ်သတ်တွေရဲ့ခံစားချက်တွေပြင်းထန်လာကြဦးမှာပါ။ ပွဲကျန်ကလဲ ၂ ပွဲပဲကျန်တော့တယ်။ တဖက်က စပါးအသင်းကတော့ အရမ်းချောင်သွားပြီ။ ကိုယ်တွေက  ခြေတက်နေတဲ့ နယူးကာဆယ်ရယ်   တန်းမဆင်းရဖို့ သေလုအောင်ကစားကြမယ့် အဲဗာတန်ရယ်။  မပြောကောင်း မဆိုကောင်း ရာသီသိမ်းခါနီးမှခြေခေါက်သွားလို့ကတော့   ချဲလ်ဆီးနဲ့ မန်ယူကိုနိုင်လိုက်တာက  နည်းစနစ်ကောင်းလို့ဆိုတဲ့ သုံးသပ်မှုကနေ ၊  ကံကောင်းလို့  ဆိုတဲ့ ကောက်ချက်ကို ချက်ခြင်းပြောင်းသွားဦးမှာပါပဲ။

ဒါကြောင့်မို့လို့ အာဆင်နယ်အသင်းနဲ့ အာတီတာတို့ဟာ  အမှတ်ပေးဇယားမှအဖြေမပေါ်သေးရုံမကပဲ​  In/Out  Conversation ကနေပါ မလွတ်ကင်းသေးဘူးလို့ဆိုရမှာဖြစ်ပါတယ်။ ဒါပေမယ့် အသင်းကြီး  ၂ သင်းကို ဆက်တိုက်အနိုင်ရထားခဲ့တာကြောင့် ကိုယ့်ကြမ္မာကိုယ်ဖန်တီးဖို့ကိုတော့  ကောင်းစွာအခွင့်အရေးရထားပြီလို့ ဆိုရပါမယ်။

Leave a Reply

%d bloggers like this: