စီနီယာအဆင့်မှာ ပွဲဦးထွက်ကောင်းနေတဲ့ အာဆင်နယ်လူငယ်

ဘရွတ်ခ်နော်တန် ကတ်ဖီ  ..  အသက်က ၁၈ နှစ်။ အာဆင်နယ် U21 အသင်းမှာကစားနေရင်း လင်ကွန်းစီးတီးအသင်းကို ရာသီကုန်အထိ အငှားနဲ့ပြောင်းရွေ့ကစားနေသူ။ 

ဒီကစားသမားလေးအကြောင်းကပြောဖို့သိပ်စောကောင်းစောနေနိုင်ပါတယ်။ ဒါပေမယ့် သူ့ရဲ့စွမ်းရည်တွေကတော့ ထင်သာမြင်သာရှိစပြုနေပါပြီ။ သူက ထွန်းတောက်လာတာဖြစ်ချင်ဖြစ်မယ် ၊ ဒါမှမဟုတ် သူလိုကိုယ်လိုဖြတ်သန်းသွားတာလဲဖြစ်ချင်ဖြစ်မယ်။ သို့သော် U21 အဆင့်ကနေ  စီနီယာအဆင့်ကို တက်တက်ချင်းမှာပဲ မျက်စေ့ကျစရာစွမ်းဆောင်ရည်ကိုပြသနိုင်ခဲ့ပါတယ်။

အခုမှ စီနီယာအဆင့် ၆ ပွဲပဲ (ပွဲထွက်အဖြစ်က ၂ ကြိမ်) ရှိသေးတဲ့ကစားသမားလေးဟာ မြေပြင်မှာတစ်ဦးခြင်း ၂၅ ကြိမ်ရင်ဆိုင်အတွေ့မှာ ၁၉ ကြိမ်အနိုင်ရတယ်။  ၁၂ ကြိမ်မှာ ၁၀ ကြိမ်လှည့်စားကျော်ဖြတ်နိုင်ခဲ့တယ်။  သူ့ကိုကျော်ဖြတ်ဖို့ကြိုးစားတာကို ၆ ကြိမ်တိတိအောင်မြင်အောင်တားဆီးနိုင်ခဲ့ပါတယ်။  ဒီနှုန်းဟာ အခုမှ စီနီယာအဆင့်ကိုရောက်လာတဲ့ ကစားသမားတစ်ယောက်အဖို့ အံ့သြစရာပါ။

ညာတောင်ပံခံစစ်မှာကစားနေတဲ့ ကတ်ဖီဟာ  လင်ကွန်းအသင်းနဲ့လည်းအသားတကျရှိနေပြီး ပွဲထွက်အဖြစ်စတင် ကစားတဲ့ ၂ ပွဲမှာတင်  အခွင့်အရေးကြီးကြီးမားမားတွေအပါအဝင်ဖန်တီးပေးမှုတွေပြုလုပ်ပြီးလင်ကွန်းစီးတီးကို အကျိုးပြုနေပြီဖြစ်ပါတယ်။  တဖက်နောက်ခံလူတွေကို ဖိအားပေးကျော်ဖြတ်ပြီး  ပံ့ပိုးမှုတွေလုပ်ပြနေတဲ့ကစားသမားလေးဟာ အချိန်တိုအတွင်းမှာပဲ  လင်ကွန်းစီးတီးပရိတ်သတ်တွေကြားထဲ ရေပန်းစားလာပါတယ်။

အကယ်၍သာ အခုလိုစွမ်းဆောင်ရည်တွေကိုဆက်တိုက်ပြသနေမယ်ဆိုရင် … သူ့ရဲ့နောက်တစ်ဆင့်က ဘာများဖြစ်မလဲ။

ပြီးခဲ့တဲ့ရက်ပိုင်းပွဲစဥ်တွေမှာ ဆဲဒရစ်တစ်ယောက်ခြေစွမ်းပြနိုင်တာကြောင့် တိုမီယာစုမကစားနိုင်ခြင်းအပေါ်မှာ စိတ်အေးခဲ့ရပေမယ့်  ညာခြမ်းခံစစ်အတွက် အာတီတာတို့ ကစားသမားရှာနေကြတာ အားလုံးအသိပါပဲ။  အဒမ်တိုင်လာ၊ လမ်းပ်တေး စသည်ဖြင့် ထိပ်တန်းကစားသမားတစ်ယောက်ကို အသင်းအတွက် ထပ်ဖြည့်ချင်နေတာပါ။ ကတ်ဖီဟာ ဒီနေရာအတွက် အရံအင်အားအဖြစ် အခွင့်အရေးရလာမလားဆိုတာ စဥ်းစားစရာရှိပါတယ်။  အထူးသဖြင့်  ဆဲဒရစ်ဟာ အသင်းသစ်ရှာဖွေလျက်ရှိပြီး နွေရာသီမှာထွက်ခွာဖွယ်ရှိနေသူတစ်ယောက်ပါ။ 

အကဲဖြတ်ဖို့ စောသေးပေမယ့်  တိုက်စစ်သမားတွေပဲနေရာယူထားတဲ့အာဆင်နယ်လူငယ်တွေကြားထဲမှာ ခံစစ်ကစားသမားတစ်ယောက်လည်းရောက်ရှိလာခဲ့ပြီဖြစ်ပါတယ်။

Advertisements
Advertisement

Leave a Reply

%d bloggers like this: