အကယ်၍သာ လာကာဇက် တစ်ယောက် လက်ကျန်ပွဲတွေမှာ ခြေစွမ်းပြနိုင်ခဲ့သည်ရှိသော်

ဒီအကြောင်းကို နိုင်ငံတကာ မီဒီယာတွေမှာ ဆွေးနွေးနေကြတာ  ပြီးခဲ့တဲ့လလောက်ထဲကပါ။ ဒါပေမယ့် Gunners’ Side အတွက်ရေးဖို့ရွေးချယ်တိုင်း  လာကာဇက်အကြောင်းက ကျန်နေခဲ့တယ်။  အခြားသတင်းတွေကိုဦးစားပေးရင်းနောက်ကိုရွှေ့ထားရတဲ့ ခေါင်းစဥ်ကို ဒီနေ့တော့ စာဖတ်သူတွေအတွက်  ညနေခင်းမှာတွေးလို့ကောင်းအောင်ရေးပေးလိုက်ပါတယ်။

လာကာဇက်သာ လက်ကျန်ရာသီမှာ ခြေစွမ်းပြနိုင်ခဲ့ရင် သူ့ကိုဆက်ပြီးခေါ်ထားဖို့သင့်လား ဆိုတဲ့မေးခွန်းပါပဲ။  ဒီမေးခွန်းကိုမဖြေခင် လာကာဇက်ရဲ့လက်ရှိအခြေအနေကိုပြန်ဆန်းစစ်ကြည့်ကြပါစို့။

“ လာကာတစ်ယောက်ကတော့  ဖြစ်တောင့်ဖြစ်ခဲရလာတဲ့အခြေအနေမှာ သူ့ဘဝသူပျော်ရွင်နေတာဗျ .. သူ့စိတ်ထဲမှာ ငါ့ကိုဒီလို လူငယ်တွေနဲ့ ကြာကြာပေးကစားစမ်းပါကွာဆိုပြီးတော့ဖြစ်နေမှာအသေအချာပဲ ”   ဒီစကားကို Daily Mirror  နဲ့အတွေ့မှာ  ချဲလ်ဆီးကစားသမားဟောင်း ဂျိုးကိုးက ပြောခဲ့တာပါ။

ကျွန်တော်ကတော့ ဂျိုးကိုးပြောတာကို သဘောတူပါတယ်။ လာကာဇက်ရဲ့ ဒီရာသီအာဆင်နယ်အသင်းမှာ ကစားနေပုံက  အရင်နှစ်တွေနဲ့မတူပါဘူး။  တိုက်စစ်မှုးတစ်ယောက် ၊ ကစားသမားတစ်ယောက်ဆိုတာထက်  လူငယ်တွေကို ဦးဆောင်နေရတဲ့တာဝန်ကိုလဲယူထားရပါတယ်။ အမှန်တကယ်က ဒီတာဝန်ဟာ အူဘာမီယန်းက ဆောင်ရွက်နေတယ်ဆိုရင် ပိုကောင်းမှာဖြစ်ပေမယ့် အာဆင်နယ်အသင်းဟာ ဦးဆောင်မှုဆိုတဲ့အရာကို အသင်းခေါင်းဆောင်ဆီကမရခဲ့ပါဘူး။  

သို့သော် လာကာဇက်ဆီကနေခေါင်းဆောင်မှုတစ်ခုကိုရရှိလိုက်တာက အာဆင်နယ်အတွက် ထင်မှတ်မထားတဲ့အပိုဆုတစ်ခုဖြစ်ခဲ့တာပါပဲ။  ဒီတော့ အာဆင်နယ်အတွက်ရော​၊  ပြင်သစ်သားကြီးအတွက်ပါ နှစ်ဦးနှစ်ဖက်အကျိုးဖြစ်ထွန်းခဲ့ပါတယ်။ အခုဆိုရင် ရာသီကုန်အထိ တရားဝင် အသင်းခေါင်းဆောင်လဲဖြစ်ခဲ့ပါပြီ။

နောက်ပြီး လာမယ့်ရာသီအပြောင်းအရွှေ့အတွက် လိုင်ယွန်အသင်းဥက္ကဌက လည်း သူတို့အသင်းက ပြင်သစ်သားကြီးကို ကြိုးစားနေကြောင်းထုတ်ပြောလာပါတယ်။ ဒါတွေဟာ အကြောင်းမဲ့တော့မဟုတ်ပါဘူး။ သူ့ရဲ့ကြိုးစားအားထုတ်မှု ၊ စီနီယာပီသမှုတို့ကနေတစ်ဆင့်မြစ်ဖျားခံလာခဲ့ကြတာပါ။

Advertisements

ဒီတော့ လာကာဇက်ရဲ့  Career က Secure ဖြစ်နေတယ်လို့ ပြောနိုင်ပါပြီ။ သူ့အနေနဲ့ အာဆင်နယ်နဲ့ လှပတဲ့လမ်းခွဲတစ်ခုဖြစ်အောင် အားထုတ်ဖို့ပဲလိုပါတော့တယ်။

လာမယ့်ရာသီဆိုရင် လာကာဇက်က အသက် ၃၁ ရှိလာမှာဖြစ်ပါတယ်။ သူ့ရဲ့အားထုတ်မှုတွေကအမြဲတန်းရှင်သန်လတ်ဆတ်နေမှာဖြစ်ပေမယ့် Output ကတော့ မေးခွန်းထုတ်ရပါလိမ့်မယ်။ စိတ်ဓါတ်နဲ့ ကြိုးစားအားထုတ်မှုဆိုတာ စွမ်းရည်ကိုတော့ တိုက်ရိုက်ကြီးမသက်ရောက်နိုင်ပါဘူး။ လာကာ ဆီမှာ အကန့်အသတ်တွေရှိလာပါပြီ။

သူ့ကိုပွဲပြည့်သုံးဖို့ဆိုတာလည်းမဖြစ်နိုင်တော့သလို ၊  စွမ်းဆောင်ရည်ကလည်း ခုထက်ပိုလာဖို့ခက်ပါတယ်။ အခုအတိုင်းထိမ်းထားနိုင်ရင်ပဲ လာကာကို  အသိအမှတ်ပြုရမှာဖြစ်ပါတယ်။  ပရီတ်သတ်ကတော့ ချစ်ကြမှာပါပဲ။ ဒါပေမယ့် အလုပ်ကို စိတ်ခံစားချက်နဲ့လုပ်တာရတာကတော့ ခက်ပါလိမ့်မယ်။  နောက်ပြီး လာကာကို ဆက်ဆွဲထားချင်ရင်လစာတွေအများကြီးသုံးရပါလိမ့်မယ်။ ဒီအချက်က အိုဇေးလ် နဲ့ အူဘာမီယန်ကိစ္စကို ချက်ခြင်းပဲသတိရစေချင်မှာပါ။

တဖက်ကတွေးစရာရှိတာကတော့  ရှေ့ကကစားသမား ၂ ယောက်နဲ့ လာကာဇက်ကတော့ Attitude ခြင်းကွာပါတယ်။ အဆင်မပြေကြရင်တောင် အိုဇေးလ်တို့ဖြစ်ရပ်တွေနဲ့တော့ တူမှမဟုတ်ပါဘူး။ ဒါပေမယ့် ဘောလုံးကွင်းထဲကအချက်အလက်တွေအရတော့ လာကာကို အများကြီးစွန့်စွားဖို့မသင့်တော့ဘူးလို့ ညွန်ပြနေပါတယ်။ ဒါကြောင့် သက်ကြီးပိုင်းကစားသမားတစ်ယောက်ကို ထိန်းသိမ်းထားခြင်စိတ်နဲ့ စာချုပ်သစ်ချုပ်လိုက်တယ်ဆိုရင်တောင်  ကာလရှည်ထက်  ၂ နှစ်ထက်မပိုတဲ့သက်တမ်းတစ်ခုသာဖြစ်သင့်ပါတယ်။ ဒါပေမယ့် လာကာဇက် ဖက်က ဒီအခြေအနေကို လက်ခံပါ့မလားဆိုတာလဲရှိပါသေးတယ်။

အသင့်တော်ဆုံးကတော့ ခြေစွမ်းပြတယ်ဆိုရင်လည်း လစာတွေအများကြီးပေးပြီး ကာလရှည်ချုပ်ဆိုတာထက် သင့်တင့်တဲ့ ပမာဏ ၊ သင့်တင့်တဲ့စာချုပ်သက်တမ်းတစ်ခုနဲ့သာကမ်းလှမ်းပြီး  အဆင်မပြေခဲ့ရင်လဲ အကောင်းဆုံးနှုတ်ဆက်ခြင်းတစ်ခုနဲ့သာ လမ်းခွဲလိုက်တာကောင်းပါတယ်။

Advertisements

Advertisement

Leave a Reply

%d bloggers like this: